Leik- og mótsreglur

Leiktími og fyrirkomulag

• Leiktími er 2x15 mínútur.
• Leikir eru flautaðir á sama tíma. Dómarar flauta til hálfleiks og leik lokið.
• Leikin er einföld umferð, allir spila við alla. Deildarmeistari er verðlaunaður eftir síðasta leik á laugardegi.
• Eftir heila umferð skiptist deildin upp í úrslitakeppni efri og neðri hluta, þar sem spilað er upp á efsta sæti í efri hluta og efsta sæti í neðri hluta hverrar deildar.

Upphafsspyrna og miðja

• Upphafsspyrna skal tekin á miðju og er heimilt að spyrna í hvaða átt sem er.
• Tekin er miðja eftir að mark er skorað.
• Óheimilt er að skora mark úr upphafsspyrnu og þegar miðja er tekin eftir að mark er skorað.

Aukaspyrnur

Þegar aukaspyrna er tekin þarf andstæðingurinn að vera í minnst 6 metra fjarlægð.

Boltinn út fyrir hliðarlínu

Ef boltinn fer út fyrir hliðarlínu skal taka innspark eða knattrak.

Innspark

• Bolti er lagður kyrr á hliðarlínu og honum komið í leik með sendingu.
• Óheimilt er að lyfta bolta hærra en í hnéhæð með innsparki. Endurtaka skal innsparkið ef það gerist.
• Óheimilt er að skora beint úr innsparki.

Knattrak

• Bolti er lagður kyrr á hliðarlínu og honum komið í leik með því að rekja boltann af stað frá hliðarlínu.

Hornspyrnur, markverðir og vítaspyrnur

• Hornspyrna er tekin þar sem marklína og hliðarlína skerast í öllum flokkum.
• Ef markvörður tekur bolta upp með höndum eftir sendingu frá samherja er dæmd bein aukaspyrna. Aukaspyrnan er tekin fyrir utan vítateig næst þeim stað sem brotið átti sér stað.
• Vítaspyrnur eru teknar á vítateigslínu.

Skiptingar

Skipti á leikmönnum skulu fara fram ca. á miðjum vallarhelmingi og mega fara fram hvenær sem er í leiknum.

Almennar reglur

Allar almennar reglur KSÍ varðandi knattspyrnu eru viðhafðar á mótinu.

Tiltal, gult og rautt spjald

Á mótinu í ár verður notast við tiltal, gult og rautt spjald.

• Tiltal — grófur leikur. Dómari ræðir við leikmann.
• Gult spjald — ítrekaður grófur leikur, eða hegðun sem dómari telur að leikmaður þurfi kælingu vegna. Leikmaður fær kælingu að lágmarki 2 mínútur. Nýr leikmaður má koma inn í staðinn.
• Rautt spjald — leikmaður uppvís að ítrekað grófum leik, óíþróttamannslegri hegðun eða öðru sem á ekki heima á knattspyrnuvelli. Lið spilar restina af leiknum einum færri.

Jöfn stig

Ef lið verða jöfn að stigum að hraðmóti eða deildarkeppni lokinni ræðst röðin í þessari röð:

1. Innbyrðis viðureign
2. Fæst mörk fengin á sig
3. Markatala
4. Fleiri mörk skoruð
5. Hlutkesti

Dómgæsla

Við leggjum mikið upp úr því að hafa góða dómgæslu á mótinu og að dómarar séu einnig að hjálpa til við að kenna leikinn á meðan honum stendur og leiðbeina á jákvæðan hátt. Allir dómarar fá stutt námskeið fyrir mót þar sem vel verður farið yfir reglur og áherslur í dómgæslu. Dómgæsla er m.a. í höndum meistaraflokks karla og kvenna í knattspyrnu.